話明戰衣，點都要形容下畀大家知係點，我真心覺得條裙係唔錯，雖然只係喺H&M買，係一條黑色嘅背心連身裙，長度到膝頭哥上面，上窄下有少少散開，最堅係胸對上嘅都係黑色seethrough，當中有啲黑色圓波波，若隱若現，似有嘢望其實又望唔到嘢咁款，個style係成熟得嚟又有啲cute，堅係一條好有心計嘅裙嚟。
話說阿Mike諗住儲多啲錢同我結婚、買樓，組織小家庭，所以佢就轉咗去而家呢間公司度做，人工當然高啲，但係比以前辛苦一百倍，其實以前都已經好辛苦。有幾辛苦？就係連續成個月每日都瘋狂OT，有時甚至OT到凌晨，就算唔凌晨都成11、12點，仲要係未食飯㗎喎！公司根本就係唔夠人，仲要不停接job，senior辭職就走去請個junior返嚟頂就算，甚至唔請，慳皮到死，冒求chur到所有員工氣絕身亡為止。
「你呢排係咪好得閒？我見你成日都好早收工，琴日六點幾已經唔見你。」人事部Macy說。「我放六點，六點半我先走㗎喎，而且準時收工都正常啫。」我說。「無，想睇下你係咪好得閒咋嘛，以前你成日都好夜收。」Macy說。
話說小妹以前係讀女校，諗返起以前中學嘅生活都好開心㗎，仲識到班好姊妹，不過硬係覺得爭咁啲嘢，就係無拍過拖。雖則每個人嘅性格都唔同，但讀女校唔多唔少都會有啲影響，你諗下六年嚟日日都淨係同女仔相處喎，雖然都有幾個阿sir，但係有幾可會同佢哋講嘢先？而且男老師同男同學係好大差距，根本都唔同，長時間咁樣真係會唔係幾識同男仔相處，所以女校嘅人出到去（大部分）一係就好摺一係就好主動，即係所謂嘅姣，而我就係屬於前者，即係慢熱，靜嗰類。
有次就係因為我拎嘢嘅時候唔小心掂到個電話，whatsapp藍tick咗，但我根本無睇到個message，當然就無覆到，然後佢就自編自導自演咗一個我偷食嘅故事，仲講到似層層，怒火中燒咁款，鬧咗我一大餐（呢啲事絕對唔係淨係女人先會做）。其實我本身已經好少會喺同朋友食飯嘅時候玩電話，特別係只有兩個人嘅時候，因為感覺唔係好尊重，難得約出嚟見面，如果要我望著你玩電話，咁又有咩意思？將心比己，所以我都唔會咁做。
每個人都有唔同嘅喜好，可能有人鍾意玩水上活動，有人鍾意玩音樂，有人淨係鍾意打機。如果無傷大雅又唔係太過份嘅話，其實都唔需要為另一半去改變自己嘅喜好，因為可以喺空餘時間做自己喜歡嘅事其實真係幸福。扣除食、瞓、工作同交通嘅時間，其實私人時間已經所餘無幾，如果不幸要加班，更加係精神同肉體上都有心無力，有時間都只係想用嚟休息，所以能夠自由自在咁做自己鍾意做嘅事其實好難得。可惜人越大，反而越容易放棄。
水鞋都有好多款，我揀嘅時候主要係著重個款好無睇、長度、重量、透氣度同舒適度等等。好現實，揀水鞋同揀男朋友一樣，第一樣一定係睇樣，唔係話唔著重內在，唔係話一定要好靚，只係如果你第一眼望落去對水鞋度已經完全無好感，我肯定就算個售貨員之後無論點sell你都好，都係唔會成功。至於好唔好睇呢家嘢其實好主觀，正所謂情人眼裡出西施，有人鍾意五顏六色夠繽紛，有人鍾意淨色夠沉實，有人鍾意有花紋，我個人就鍾意黑色，型得嚟又唔怕污糟。
其實我真係好嬲，我嬲佢點解要同我講可以準時收工，我嬲佢公司點解會咁多嘢做，搞到佢晚晚凌晨，甚至朝早先收工，我嬲佢同事點解唔幫佢分擔下，我嬲佢點解唔反抗腦細，但我最嬲係佢無好好愛惜自己身體。我係好嬲，但係我又可以點做？理性同我講我係唔可以嬲，加班佢都唔想，腦細唔放人，可以點？我唔可以比佢份工影響我哋嘅關係，我唔可以輸畀呢個小三（份工），而且等咗個幾鐘，都係想見一面，食餐飯，如果我仲嬲，咁咪更加嘥咗啲時間？
唔好以為外國人就一定對人好nice，最初幾日真係無人同我講嘢，我英文又唔係好，淆底症發作，驚講得樣衰畀人笑，於是更加唔敢主動聊人講嘢，變咗個啞人。但係嗰陣得我一個人，如果我唔主動啲，真係無人幫到我，唯有豁出去，以反正柒咗都無人知嘅心態去聊人傾計，點知又真係work喎，仲因為教佢哋講廣東話粗口而無啦啦friend咗，題外話其實佢哋英文grammar都成日錯，根本唔會介意你講得好唔好，只要你夠膽講就得。
Ken哥係公司嘅老臣子，負責採購同管倉，可以話係一人之下，萬人之上，除咗腦細，無人搞得掂佢，個個都要睇佢面色。十次有九次我見親佢都係大大聲咁鬧緊人，真係好彩我唔係直接隸屬佢。除咗黑面，佢仲有一大特色，就係無論發生咩事都一定會大大聲凶咗人先，就算後來發現原來係自己錯，佢都唔會講sorry㗎喎，點都可以賴落你度鬧你，總之你錯佢就鬧你，佢錯都係鬧你。
比較有良心嘅公司加班係會計返鐘或者計返錢畀你，可惜大部分公司其實係乜Q都唔會畀，特別係廣告、設計同Marketing等等。佢哋永遠覺得人工唔止包你朝9晚6嘅時間，而係包起咗你成個人，即係包括放咗工嘅時間，而家有咗whatsapp就更加方便，就算放緊假都走唔甩。大佬呀，叫人做嘢係要畀錢㗎，幾時先可以改變加班合理化呢個觀念？有啲腦細仲會衰到覺得員工係突登加班呃鐘，講真我寧願唔要你嗰少少錢，我準時收工返去休息多啲唔好？
「你做咩呀！？」我說，我心知不妙，於是即刻截住佢。「我諗住倒咗啲湯佢咋，飲唔晒呀，好飽。」Mike說。「梗係唔得啦！想死呀你！倒我阿媽啲湯！」我說，一句激嬲女朋友原來仲有呢句做例子，而阿媽就喺旁邊偷笑咗一聲。「好飽飲唔晒咪晏啲先飲囉，總之邊個都唔可以倒我阿媽啲湯，知道未？」我細細聲說。
有時唔係話唔想預早訂位，但係平日夜晚真係隨時都會OT，都唔知幾點先可以收工，點訂啫？有時就係即興想食某餐廳，咁無訂位如果滿座無得食都好正常，但最常出現嘅反而係有好多位但都唔會畀你揀位坐，個個位都係「話」畀人訂咗，但係次次我食飽走嘅時候啲位都係吉嘅，可唔可以唔好當我係弱智呢？我寧願你直接同我講：「唔好意思呀卡位我哋要留畀三位以上嘅客人。」
我從來都唔會check另一半嘅電話或者Facebook，有時知道佢同緊另一個女仔whatsapp，即使嗰個係佢以前鍾意過嘅人，係會有少少唔開心，但佢話要畀我睇佢哋嘅whatsapp對話以表清白我都係唔會睇，因為我覺得睇嚟都嘥氣。
